खबरकुञ्ज
बेसीशहर, कार्तिक २४ । हाल जापानमा रहेका लमजुङे गायक तथा सर्जक रुपेश गुरुङले नयाँँ मौलिक लोकगीत “मेरो माया” सार्वजनिक गरेका छन् ।
लमजुङको दोर्दी गाउँपालिका वडा नंं ६ हरिगाउँ घर भइ हाल रोजगारीको सिलसिलामा जापानमा रहेका गुरुङले लोकप्रिय लोकदोहोरी गायिका सर्मिला गुरुङसंगको सहकार्यमा “मेरो माया” नामक लोक दोहोरी गीत सार्वजनिक गरेका हुन् ।
सर्मिला गुरुङ युट्युव च्यानलबाट सार्वजनिक भएको यो गीतमा लय, शब्द र संगीत सर्मिला गुरुङको छ । गीतमा रुपेश र शर्मिलासँगै सागर गुरुङ, सागर बाजुराली, टीका गुरुङ र भीमकला गुरुङले स्वर भरेका छन् ।
स्मृति तिमिल्सिना ‘गुरुआमा’ले निर्देशन गरेको गीतको भिडिओमा रुपेश, शर्मिला, सागर, टीका, भीमकला र साथीहरूको अभिनय रहेको छ ।
गायक सर्जक रुपेशले यस अघि पनि सर्मिला गुरुङसंग गाएको “मायालाई सम्झेर” बोलको सालैजो भाकाको गीत निकै लोकप्रिय भएको थियो । उक्त गीतमा रुपेश गुरुङ र सागर आलेको शब्द, सर्मिला गुरुङको संगीत थियो । गीतमा बिबि अनुरागीले संगीत एरेन्ज गरेका थिए ।
यसबाहेक दाइकी साली भाउजुकी बहिनी भन्ने उनको गीत पनि निकै रुचाइएको थियो ।
